1Jo 3 | KQC | STEP | Va mokefa, uni Baba di uka mana di gokai tora una rofu bi sena maro dada una bi ini midamida vo nibiyagane. Una bi rama iniye ini midamida. Ma kono di vene tau bi una vei mama de reyadi adina bi Sei vei mama de reyadi dada.

a 3.1:Jn 1.12

c 3.5:Jn 1.29

d 3.11:Jn 13.34

g 3.23:Jn 13.34, 15.12, 17

1 John 3

Sei di midamida

1 Va mokefa, uni Baba di uka mana di gokai tora una rofu bi sena maro dada una bi ini midamida vo nibiyagane. Una bi rama iniye ini midamida. Ma kono di vene tau bi una vei mama de reyadi adina bi Sei vei mama de reyadi dada. ^a 2 Nai mokei vava reida vene, ruika una bi Sei di midamida. Gabi una gokai bi ogau nina kode. Idu, yomina una diba: Keriso ogau nigo ri, bi una bi ina kana nigifa adina ina iniye vegifa. 3 Amiye tau Keriso rofu uka mokena aidedi bi ini uka ideri vegu no yokoi de Keriso ini uka ideri vegu no yokoi de kana.

4 Vegu no redo amiye bi Sei di ini ago gira ukerova redo adina vegu no bi ago gira ukerova rededi. 5 Ya ya diba, Keriso baiyo bi, vegu no ^{▼▼3.5vegu no;bura bedakai biuni vegu nonufa.} moi taga rigi. Ina ideri vegu no yokoi de amedo. ^c 6 Keriso ideri amedo amiye bi vegu no rega de amedo. Ma vegu no rega amei baido amiye bi Keriso vena de, o vei mama rena de.

7 Nai midamida, amiye yokoi yaku ga ya ofarosi reyaine. Kaere yaku vegu rorobo redo amiye bi mokena rorobo redo amiye, Keriso iniye bi mokena rorobo rena amiye kana. 8 Vegu no redo amiye bi Satani adinari amedo, adina Satani bi vegu no rega amegamo amiye ini adinari gutu. Sei di ini Mida ogau niyo di ini adina iniye bi yomakai: Satani di ini vegu no redo mina moi no regika deyo.

9 Kaere Sei rofu vata niyadi bi vegu no toga de rega ameibigedi, adina Sei di ini yo bi ina vene ideri amedo. Mina vene bi vegu no de rededi adina Sei bi ina vene di Baba dada. 10 Mina bi gokai diba nigifa kaere bi Sei di ini midamida ma kaere bi Satani di midamida: kaere amiye mokena rorobo de reibigo bi Sei di ini mida de, mina kana kaere ini dubuini uka de mago ka makai.

Uniyeuniye uka mabinadi

11 Ini adinari gutu baiyo gua neideyadi sina bi yomini: uniyeuniye rofu uka mabinadi. ^d 12 Cain yaku reyo kana vegu bi ga renadi. Ina bi amiye no di ma ina yaku ini usika Abel umuyeyo. Beika resi Cain yaku umuyeyo? Adina Cain di vegu bi no ma Abel di vegu bi mokena rorobo nufa. ^e

13 Mina dada nai dubuiyaka, kono di vene yaku ya rofu gubuyo regedi ri bi tururu ga refa. 14 Uni dubuiyaka uka masifa dada muyena bi feresi, vegu rofu bae deyafa. Amiye yokoi ini dubuiyaka uka de mago ri bi mina amiye bi muyena di vava ideri amedo. ^f 15 Ini dubuiyaka rofu gubuyo redo amiye bi amiye umuyedo amiye. Ya ya diba, toga ameibobina vegu bi amiye umuyedo amiye sa de amedo. 16 Uka mana di vegu bi yomina vegu dudu vei mama regifa: Mina dada Keriso ini vegu una maro. Mina dada una yaku ka uni vegu mana di uni dubuiyaka rofu! 17 Amiye yokoi kono di ini gugura tau nufa ma ini dubuini bi gugura tau de ma vesi iriyeduka de rego bi gokai ida dudu Sei di uka mana bi ina sa amego? 18 Nai midamida, amiye uka mana bi vena dudu ma afiye dudu maka ga manadi. Mina bi uka mana rama iniye, goina bi moimairi iniye ogau nido.

Sei di nemokori are rei gira rena

19 Mina bi gokai diba nigifa una bi sina rama di, ma gokai uni uka ini budari aigifa. 20 Uni uka meko yaku una rofu nido una bi no vo nisi bi una una diba Sei bi isivaga iniye uni uka meko kana de. Ma beika tau bi ina ina diba. 21 Nai mokei vava reida vene, uni uka meko yaku una rofu de nido una bi no vo nisi bi, una bi Sei di nemokori are regifa, ori yokoi de dudu. 22 Kamini una yaku beika bodo tau ina rofu usa nigifa ri bi ina yaku una mago. Adina ini ago gira moi gira resifa ma ina moi ada rena vegu resifa. 23 Sei di ago gira una rofu bi yomini: ini Mida Iesu Keriso di ini roka rofu mokena vari gira aigifa ma uniyeuniye uka mafa. Mina ago gira bi Iesu Keriso yaku sena una maro. ^g 24 Ini ago gira moi gira redo amiye bi Sei sa amedo ma Sei ka ina sa amedo. Ma una una diba ina bi una sa amedo adina una una diba bi ini Vima una maro.